Истражувачката група Mediazona, во соработка со рускиот сервис на BBC News, објави дека потврдениот број на руски војници кои загинале или починале од последици на ранувања во Украина надминува 200.000. Според извештајот, реалниот број на жртви веројатно е многу поголем и може да биде и двојно поголем, пренесува Kyiv Post.
Истражувачите ја потврдиле секоја жртва по име, користејќи посмртници, цивилни изводи од матични книги, списоци на единици, објави на социјални мрежи, известувања за погреби и евиденции од гробишта. Клучен момент бил протекувањето на доверливи владини податоци за безбедносни проверки на околу 23.000 лица утврдени како мртви. До среда напладне, вкупниот број потврдени жртви изнесувал 200.186. Во извештајот се нагласува дека ова е „конзервативна долна граница“.
Загинатите потекнуваат од 26.600 населби низ сите единаесет временски зони на Русија. Најпогодени се сиромашните региони со висок број доброволци, особено јужносибирските региони долж границата со Монголија и Кина: Тува (476 загинати на 100.000 жители), Бурјатија (400), Забјакалски крај (362) и Алтајската Република (316). Некои села изгубиле значителен дел од своите мажи; на пример, селото Чикој во Бурјатија, со 525 жители, изгубило 10 мажи.
Западните воени проценки ги ставаат вкупните загуби на Кремљ во Украина на околу 1,2 милиони луѓе, со 300.000–500.000 загинати. Руски официјални податоци не се ажурирани од септември 2022 година, кога беше соопштено дека загинале 5.937 војници. Државната агенција TASS тврди дека Украина претрпела повеќе од еден милион загинати војници, што е бројка која значително се разликува од независните проценки.
