Американското Министерство за правда го објави првиот пакет документи поврзани со случајот на осудениот сексуален престапник Џефри Епштајн. Материјалите опфаќаат фотографии, видеоснимки и обемна истражна документација, а нивното јавно објавување е резултат на закон усвоен од Конгресот, со кој се бара поголема транспарентност за овој случај.
Според објавите на Би-Би-Си, во документите се појавуваат имиња на бројни светски познати личности, меѓу кои поранешниот американски претседател Бил Клинтон, британскиот принц Ендру, како и музичките ѕвезди Мик Џегер и Мајкл Џексон.
Во дел од материјалите се наведува и името на актуелниот американски претседател Доналд Трамп. Во еден исказ се тврди дека Епштајн наводно му претставил 14-годишно девојче, при што го прашал дали тоа е „во ред“. Според наводите, Трамп наводно реагирал со насмевка и кимнување, без да даде вербален одговор.
Во тужба поднесена во 2020 година против имотот на Епштајн, се наведува дека двајцата наводно се смееле, додека девојчето се чувствувало непријатно и збунето, но поради својата возраст не можело целосно да ја разбере ситуацијата.
Заменик-државниот обвинител Тод Бланш потврди дека Министерството за правда планира постепено да објави „неколку стотици илјади документи“ поврзани со случајот, но дел од нив ќе останат недостапни за јавноста со цел да се заштити идентитетот и безбедноста на жртвите.
Објавувањето предизвика силни политички реакции. Лидерот на демократите во Сенатот, Чак Шумер, го обвини Трамп дека свесно го крши законот кој самиот го потпишал, оценувајќи дека станува збор за обид да се прикрие вистината. Тој побара итна реакција и вклучување на Конгресот.
Од Министерството најавуваат дека нови серии документи ќе бидат јавно достапни во наредните недели, при што се очекува објавување на уште стотици илјади страници материјали поврзани со овој случај.
