Четворица возрасни, меѓу кои и мајката на новороденчето, се обвинети за убиство на девојче чие тело било пронајдено во помошен објект во Шефилд, Велика Британија.
Пред Крунскиот суд во Шефилд се појавиле 20-годишната Андреа Скопова, 19-годишниот Петер Хорват Помладиот, 38-годишниот Петер Хорват Постариот и 37-годишната Нина Хорватова. Сите се словачки државјани и се товарат за убиството на новороденчето, во постапката идентификувано како „Бебе С.“.
Според обвинителството, телото било пронајдено завиткано во пешкир и ставено во сина торба во помошен објект во областа Винкобанк.
Обвинителот пред судот навел дека на телото биле констатирани 33 рани за кои се тврди дека биле нанесени при 15 одделни убоди. Повредите биле на лицето и телото на новороденчето.
Четворицата возрасни се обвинети и за предизвикување или дозволување смрт на дете, како и за попречување на правдата поради наводно чистење на местото каде што се случило делото.
Во истиот случај пред суд се појавило и 15-годишно девојче, чиј идентитет поради возраста не смее да биде објавен. Таа не е обвинета за убиството, туку за попречување на правдата.
На рочиштето било наведено дека Скопова е мајка на бебето, додека идентитетот на таткото засега не е познат. Таа била во врска со Петер Хорват Помладиот, кој е син на другите двајца возрасни обвинети.
Судијата одредил сите обвинети да останат во притвор, а почетокот на судењето е закажан за 12 април следната година. Се очекува процесот да трае меѓу шест и седум недели.
Уште две жени, на возраст од 26 и 37 години, биле уапсени под сомнение за убиство, но според објавените информации се пуштени со кауција додека истрагата продолжува.
Сите обвинети се сметаат за невини додека нивната вина не биде утврдена со правосилна судска одлука.
