Инаку здрав 22-годишен маж од Австрија доживеал акутен срцев застој откако консумирал чај од кратом – растение кое во Европа станува сè попопуларно и лесно се набавува преку интернет.
Младиот човек ненадејно се онесвестил во својот стан. Неговиот цимер го пронашол без свест, со конвулзии и без пулс, по што веднаш започнал со реанимација.
Лекарите успеале да го спасат и покрај тоа што доживеал два срцеви застоја. Поради сериозноста на состојбата му бил вграден пејсмејкер, а од болница бил пуштен по две недели.
Првично не било познато што ја предизвикало состојбата. Откако пациентот им кажал на лекарите дека пиел чај од кратом, токсиколошките анализи покажале значително зголемени концентрации на митрагинин – една од главните активни состојки на растението.
Лекарите од Инсбрук го опишале случајот како прв регистриран срцев застој во Австрија поврзан со изолирано труење со кратом. Тие предупредуваат дека, иако кратомот понекогаш се претставува како супстанција со низок ризик, може да предизвика сериозни и потенцијално фатални несакани ефекти.
Кратомот се добива од листовите на дрво кое потекнува од Југоисточна Азија. Во помали дози може да има стимулирачко дејство, додека во поголеми дози неговите ефекти можат да бидат слични на опиоидите.
Германските здравствени власти претходно предупредиле дека безбедноста и ефикасноста на кратомот не се доволно испитани и дека неговата употреба може да доведе до зависност и сериозни несакани реакции.
