Осум лица го загубија животот, а едно е тешко повредено во вооружен напад што се случил во четвртокот, 5 ноември, во три села во западниот дел на Турција.
Трагедијата се случила во раните вечерни часови во руралното подрачје на покраината Афјонкарахисар, која се наоѓа меѓу Анкара и Измир.
Турската полиција започнала голема потрага по осомничен напаѓач кој, според првичните информации, побегнал од местото на злосторството со црвен автомобил.
Од кабинетот на гувернерот на Афјонкарахисар потврдија дека во нападот загинале осум граѓани, додека уште едно лице е во тешка здравствена состојба.
Според информациите објавени од турските медиуми, две жени со прострелни рани биле пронајдени на пат во селото Јукаритандир. Тие итно биле пренесени во болница, но лекарите не успеале да им ги спасат животите.
Во селото Кијир биле пронајдени уште три безживотни тела, а дополнителни три жртви биле откриени во селото Ајазини.
Едно тешко повредено лице е хоспитализирано во критична состојба и лекарите се борат за неговиот живот.
Полицијата презема интензивни активности за пронаоѓање на осомничениот и утврдување на сите околности поврзани со нападите.
Засега не се соопштени официјални информации за мотивот, ниту за идентитетот на лицето по кое се трага.
Истрагата е во тек, а надлежните служби работат на расветлување на трагедијата што ја потресе Турција.
