Училишен автобус во кој се превезувале околу 20 деца утринава удрил во ѕид од куќа во германскиот град Бад Олдеслое, во покраината Шлезвиг-Холштајн. По несреќата интервенирале екипи на итната медицинска помош, пожарникари и полиција, а засега не е познато колку лица се повредени и колку се сериозни нивните повреди.
Сообраќајната несреќа се случила околу 7:20 часот на улицата Зилцберг. Според првичните информации, од сè уште неутврдени причини автобусот поминал преку кружен тек, по што продолжил и удрил во ѕидот на една куќа. За настанот известува германскиот весник „Билд“.
По силниот удар, возачот останал заглавен во автобусот и било потребно да интервенираат спасувачките екипи. Полицијата потврдила дека една жена и неколку патници се здобиле со повреди, но точниот број на повредени сè уште не е утврден.
На местото на несреќата пристигнале медицински екипи, пожарникари и полициски службеници. Просторот околу местото на судирот е ограден, додека надлежните служби ги преземаат потребните активности и ги утврдуваат околностите под кои дошло до несреќата.
