Истрагата за двата случаи на разбојништво со смртни последици во скопските населби Хром и Ѓорче Петров продолжува, а истражните органи ги очекуваат резултатите од ДНК-вештачењата, кои треба да бидат дел од доказите во предметот.
Од Јавното обвинителство за „Скопје1“ потврдиле дека надлежниот обвинител денеска до судот ќе достави предлог за определување нов краткотраен притвор во траење од 48 часа за осомничените.
„Се преземаат дејствија за прибирање докази, јавниот обвинител до судот денеска ќе достави предлог за определување нов краткотраен притвор од 48 часа“, информирале од Обвинителството.
Според неофицијални информации на „Скопје1“, добиени од извори запознаени со истрагата, во моментов се очекуваат резултатите од ДНК-анализите. Тие треба да помогнат во обезбедувањето дополнителни докази и утврдувањето на околностите под кои се случиле двата настана.
Четири лица беа приведени по двата случаи
Во врска со овие настани претходно беа приведени четири лица: А.С. (22), Х.Е. (20) и К.А. (58), сите од Скопје, како и М.Р. (26) од Струмица.
Полицијата ги поврза со двата случаи, кои се истражуваат како разбојништва со смртни последици.
Првиот случај беше откриен на 22 октомври во скопската населба Хром. Во својот дом тогаш беше пронајден починат 62-годишниот С.Ј., кај кого биле забележани траги од насилство.
Неколку дена подоцна, на 27 октомври, нов трагичен случај беше регистриран во Ѓорче Петров. Во куќа на улицата „Ѓурчин Кокале“ беше пронајдена почината 76-годишната О.А., исто така со траги од насилство.
Неофицијално се споменуваат признанија
„Скопје1“ претходно, повикувајќи се на извори од Министерството за внатрешни работи, објави дека сите четворица приведени наводно дале признанија. Според тие информации, тројца биле директно инволвирани во делата, додека за четвртото лице се разгледувала можноста да одговара за помагање.
Сепак, овие информации засега немаат официјална потврда од Јавното обвинителство.
Со новиот предлог за краткотраен притвор, обвинителството бара дополнително време за продолжување на истражните дејствија и прибирање докази. За тоа дали на осомничените ќе им биде определен нов притвор од 48 часа ќе одлучува надлежниот суд.
Истрагата продолжува, а резултатите од ДНК-вештачењата и останатите докази треба да помогнат во утврдувањето на сите околности и индивидуалната улога на секое од лицата опфатени со постапката.
