Патници на лет на American Airlines доживеале вистинска драма откако лаптоп се запалил во авионот за време на патувањето од Атланта кон Далас.
Според информациите, пилотот ја известил контролата на летање дека избувнал пожар во задниот дел од кабината, додека членовите на екипажот веднаш започнале со негово гаснење.
Во комуникацијата со контролата, пилотот подоцна навел дека најверојатно четворица или петмина патници се здобиле со изгореници од лаптопот. Уредот бил ставен под контрола, а авионот безбедно слетал на аеродромот „Далас-Форт Ворт“.
По слетувањето го пречекале итните служби. Еден од патниците побарал лекарска помош, но по извршениот преглед бил пуштен.
Од авиокомпанијата соопштиле дека екипажот реагирал брзо и професионално откако бил забележан чад од електронскиот уред.
Инцидентот повторно го насочи вниманието кон ризиците од литиумските батерии во лаптопите, мобилните телефони и преносните полначи. Американската Федерална управа за воздухопловство предупредува дека ваквите батерии можат да се прегреат доколку се оштетени, неправилно спакувани или преполнети.
Според наведените податоци, само годинава се регистрирани 58 инциденти со литиумски батерии поврзани со чад, пожар или екстремно загревање.
