Сериозни неправилности биле откриени при полициска контрола на комбе кое вршело организиран превоз на ученици кај Табановце. Во возилото биле превезувани дури 18 деца, иако според податоците во сообраќајната дозвола, комбето смеело да превезува најмногу девет лица.
Контролата била извршена на 25 септември во 07:20 часот на локалниот пат Куманово-Табановце, во селото Табановце. Возилото било запрено од полициски службеници од Мобилната единица за безбедност на сообраќајот на патиштата при Секторот за сообраќајни работи.
Станувало збор за комбе со кумановски регистарски ознаки, сопственост на правен субјект од Куманово, кое било наменето за јавен превоз на патници, односно за организиран превоз на ученици.
При проверката било утврдено дека возачот С. П. (49) од Куманово во возилото превезувал 10 деца повеќе од дозволениот број. Наместо предвидените најмногу девет лица, во комбето имало вкупно 18 деца.
Но, тоа не била единствената неправилност. Над возилото бил извршен и вонреден технички преглед, при што стручните лица констатирале неисправност на уредите за сопирање. Биле утврдени проблеми со силата на сопирање и кај работната и кај помошната сопирачка.
Поради утврдените прекршоци, против правниот субјект, одговорното лице во правното лице и возачот биле преземени соодветни мерки, а тие ќе се соочат со санкции предвидени со закон.
Возилото веднаш било исклучено од сообраќај и ќе остане надвор од употреба сè додека не се отстранат утврдените технички недостатоци.
Од полицијата повторно апелираат до сите учесници во сообраќајот доследно да ги почитуваат сообраќајните правила и прописи, особено кога станува збор за превоз на деца, со цел да се спречат ризични ситуации и да се зголеми безбедноста на патиштата.
