Московски суд го осуди поранешниот руски дипломат Арсениј Коновалов на 12 години затвор во казнена колонија со максимална безбедност, откако беше прогласен за виновен за предавство и соработка со американското разузнавање, соопшти руската Федерална служба за безбедност (ФСБ).
Според ФСБ, Коновалов, роден во 1987 година, за време на неговиот ангажман во Соединетите Американски Држави, додека бил вработен во Министерството за надворешни работи на Русија, активно пренесувал класифицирани информации до американски разузнавачки структури. Информациите до кои имал пристап во рамки на своите дипломатски должности, како што наведуваат руските безбедносни служби, ги предавал за финансиски надомест.
„Утврдено е дека А.С. Коновалов, за време на долгорочно службено патување во Соединетите Американски Држави, намерно и систематски пренесувал доверливи податоци до американското разузнавање“, стои во официјалното соопштение на ФСБ, без дополнителни детали за содржината на информациите.
Коновалов беше уапсен во март 2024 година од страна на руското контраразузнавање. Руските медиуми тогаш објавија видео од моментот на неговото апсење, на кое се гледа како е запрен додека управувал со автомобил, видливо изненаден од интервенцијата на безбедносните служби и подоцнежните обвиненија.
ФСБ не откри за која конкретна американска разузнавачка агенција станува збор, ниту каков тип на доверливи податоци биле предадени. До овој момент, нема официјална реакција или коментар од американските разузнавачки служби.
Според рускиот весник „Комерсант“, Коновалов во периодот од 2014 до 2017 година работел како втор секретар во Генералниот конзулат на Руската Федерација во Хјустон, што му овозможило пристап до чувствителни дипломатски и државни информации.
