Четворица возачи се санкционирани откако со своите возила го попречувале сообраќајот на булеварот „Јане Сандански“ во Скопје. Случајот бил откриен по видео што беше споделено во дел од медиумите, на кое се гледа како неколку автомобили го блокираат движењето на булеварот.
На 11 октомври 2026 година, во Одделението за безбедност на патниот сообраќај при СВР Скопје биле повикани четири лица: Д.Г. (28), кој управувал автомобил „ауди“ со скопски регистарски ознаки, М.П. (25), кој возел „бмв“, исто така со скопски таблички, Љ.Б. (48), кој управувал патничко возило „ауди“, и С.С. (23), кој бил зад воланот на автомобил „сузуки“. И останатите возила биле со скопски регистарски ознаки.
Од Министерството за внатрешни работи информираат дека против четворицата се преземени соодветни мерки согласно Законот за безбедност на сообраќајот на патиштата поради сторен сообраќаен прекршок.
Возачите ќе треба да ги платат глобите предвидени со закон.
