Божиќната прослава на синдикатот на вработените во загрепскиот јавен превоз (ЗЕТ), која требало да биде свечено и опуштено дружење пред празниците, се претвори во вистински скандал што ја шокираше јавноста во Хрватска.
Настанот се одржал во сала во близина на Загреб, а присуствувале околу 460 членови и гости. Наместо празнична атмосфера, музика и честитки, забавата излегла од контрола, а дел од срамните сцени биле снимени и брзо се проширија на социјалните мрежи.
На видеата што кружат по интернет може да се види како еден од присутните се качува на маса и започнува да танцува со соблечени панталони, додека околу него има смеа, навивање, но и шокирани реакции од дел од гостите. Многумина оценуваат дека ваквото однесување е крајно непримерно, особено ако се има предвид дека станува збор за организирана божиќна прослава поврзана со јавна служба.
Според сведочења на присутни, алкохолот се консумирал во големи количини, по што ситуацијата постепено ескалирала.
Тепачка со бендот и повредени музичари
Инцидентите кулминирале кога дел од гостите влегле во физичка пресметка со бендот кој настапувал таа вечер. Настапот бил прекинат, а неколку музичари биле повредени. Хрватските медиуми објавија дека имало удари и повреди по главата и телото, а еден од музичарите завршил и со медицински интервенции.
Наместо празнична музика, салата била исполнета со викање, турканици и хаос, по што прославата била практично прекината.
Реакција на синдикатот и бурни реакции од јавноста
По објавувањето на снимките, синдикатот на ЗЕТ соопшти дека се оградува од однесувањето на поединци и најави дека ќе бидат преземени соодветни дисциплински мерки против оние кои го нарушиле редот и угледот на организацијата.
Сепак, реакциите на јавноста не стивнуваат. На социјалните мрежи граѓаните зборуваат за „срамна слика“ од божиќна прослава, додека други прашуваат како вакви сцени се можни на настан со толку голем број луѓе и дали некој воопшто имал контрола врз организацијата.
Настанот отвори и поширока дебата за одговорноста, однесувањето на јавни службеници и границата меѓу забава и скандал.
