Жителите и земјоделците во близина на грчкиот град Лариса секојдневно минуваат преку мост кој е официјално затворен и сериозно оштетен уште од септември 2023 година, само за да скратат неколку километри од патот.
Мостот Палеопиргос беше тешко оштетен за време на разорната бура „Даниел“, кога во регионот Тесалија беа уништени десетици мостови. Денес, неговиот централен дел е пропаднат речиси до нивото на реката Пинеј.
Снимки направени со дрон покажуваат како теренски возила и пикапи минуваат преку оштетениот мост, и покрај тоа што сообраќајот е официјално забранет.
Иако има предупредувања, на мостот не се поставени физички бариери, па многу возачи продолжуваат да го користат. Дополнителен проблем е што некои навигациски системи сè уште ги насочуваат туристите токму по оваа траса, поради што тие дури на лице место сфаќаат дека патот е небезбеден.
Локалните жители велат дека алтернативниот пат е значително подолг и поскап, особено за земјоделците кои секојдневно ја користат оваа делница. Сепак, секое минување преку оштетениот мост претставува сериозен ризик.
По објавувањето на снимките, жителите се надеваат дека надлежните конечно ќе постават физички пречки и ќе спречат можни трагични последици.
