Силно невреме со пороен дожд, грмежи и бурен ветер ги зафати Словенија и Хрватска, а на повеќе места веќе се пријавени паднати дрвја, поплавени улици и интервенции на пожарникарите.
Невремето е поврзано со силен студен фронт кој преку северна Италија и Алпите се движи кон Словенија, Хрватска и останатиот дел од западниот Балкан.
Во Словенија биле регистрирани исклучително силни налети на ветер. На метеоролошката станица Канин бил измерен удар од дури 103 километри на час, додека за делови од земјата биле издадени предупредувања поради силен дожд и невреме.
Промената на времето веќе ја зафати и Хрватска.
Во Риека паднал обилен дожд, а на крстосницата меѓу улиците Вуковарска и Антун Барца се создала поплава. Во градот било соборено и дрво во близина на „Електроприморје“.
Силен ветер го зафатил и Загреб, каде што на повеќе локации биле соборени дрвја и големи гранки. Загрепските пожарникари за само 45 минути имале седум интервенции, меѓу кои отстранување паднати гранки, дрвја и лимови кои претставувале опасност.
За Риечкиот регион е издаден портокалов метеоаларм. Метеоролозите предупредуваат на силни грмежи, можен град, локални бујични поплави и налети на ветер посилни од 65 километри на час.
Невремето претходно го погоди и северниот дел на Италија. Во областа Бреша пожарникарите имале десетици интервенции поради паднати дрвја, поплави и последици од силниот ветер и дождот, додека во Милано превентивно биле затворени градските паркови.
Во следните часови нестабилниот систем ќе продолжи да се движи кон исток и југ, носејќи ризик од нови силни грмежи, поројни врнежи и силен ветер во делови од регионот.
