Колони од студенти, граѓани и велосипедисти од сите краеви на Србија денес се движат кон Нови Сад, каде утре ќе се одржи комеморација за трагичниот настан на Железничката станица, каде што животот го загубија 16 луѓе.
На патот кон градот, маршевите беа пречекани со огромна поддршка од локалното население. Во Сремски Карловци, на пример, учесниците беа пречекани со огномет и транспаренти со пораки како „Сремски Карловци се со студентите“, создавајќи атмосфера полна со емоции и солидарност.
„Ова е едно од најемотивните патувања во мојот живот. Во Змајево нè пречекаа пријателите на Вукашин со маици со неговиот лик, а во Степановиќево семејствата на другите жртви. Се потсетивме зошто чекориме – за достоинство и вистина,“ изјави Мирко, студент од Филозофскиот факултет во Нови Сад.
Колоните од Суботица, Рума, Вршац, Нови Пазар и Белград се очекува да пристигнат вечерва, а на раскрсницата кај Булеварот на ослободувањето и Улицата на народниот фронт веќе се собираат граѓани, подготвени да ги поздрават.
Многумина кои учествуваат во маршот истакнуваат дека овој настан не е крај, туку почеток на подолга борба за правда и промени.
„Не се обѕираме на политички пораки или изјави. Нашата цел е да се сеќаваме и да покажеме дека не сме заборавиле. Ова е борба за достоинство и подобра иднина,“ вели студентка од Електротехничкиот факултет.
Маршот, кој трае повеќе од две недели, според учесниците, им овозможил да се поврзат со непознати луѓе и да споделат заедничка идеја – солидарност и отпор.
Комеморативниот собир во Нови Сад е закажан за сабота, 1 ноември, кога ќе се одаде почит на загинатите, а според студентите, на овој настан ќе се испрати и порака за промени и одговорност.
Не дознавај последен- читај ПРВ.мк
