Железничкиот сообраќај во Србија денеска беше целосно парализиран откако компанијата „Србијавоз“ доби вознемирувачка дојава дека во сите возови и по пругите низ земјата се поставени експлозивни направи. Како резултат на тоа, сообраќајот е привремено прекинат, а патниците останаа во неизвесност додека полицијата ги спроведува безбедносните проверки.
Во официјалното соопштение од компанијата се наведува дека „Србијавоз интензивно соработува со Министерството за внатрешни работи за целосно расчистување на ситуацијата и гарантирање на безбедноста на граѓаните“. МВР веќе излезе на терен, а специјални екипи вршат детални проверки на возовите, станиците и железничката инфраструктура.
Телевизијата Н1 пренесе дека патничките возови кон Нови Сад нема да сообраќаат во текот на попладневните часови, како и во утринските термини на 1 ноември. Дополнително, невозможно е да се купат билети преку интернет платформата на „Србијавоз“ – системот прикажува порака дека „нема возови на бараната дестинација“.
Ситуацијата станува уште почувствителна ако се има предвид дека утре во Нови Сад е закажан комеморативен собир по повод една година од трагичниот инцидент во кој 16 лица го загубија животот по уривање на бетонска настрешница на железничката станица.
Ова не е првпат во Србија да се појават вакви дојави за поставени бомби во периоди кога земјата се соочува со поголеми јавни настани или протести. И претходно имало вакви случаи, но ниедна експлозивна направа никогаш не била пронајдена, потсетува Н1.
Не дознавај последен- читај ПРВ.мк
