Несекојдневен и опасен случај ја крена полицијата на нозе во белградската населба Палилула, откако во таванот на стан била пронајдена рачна бомба.
Според информациите на српски „Курир“, сопственикот на станот ја известил полицијата откако неговиот 39-годишен потстанар, кој неодамна се вселил, ја забележал експлозивната направа.
Бомбата била скриена во отвор во таванот на станот.
Постојат сомнежи дека таму ја оставил претходниот станар, кој во меѓувреме починал, но засега нема официјална потврда кој и кога ја сокрил.
По пријавата, на местото пристигнала полицијата. Бил извршен увид и контрадиверзионен преглед, а пронајдената рачна бомба е испратена на вештачење.
Случајот добил дополнителен пресврт кога, според информациите на „Курир“, било утврдено дека по 39-годишниот маж кој ја пронашол бомбата веќе била распишана полициска потрага.
Надлежните продолжуваат со утврдување на сите околности околу потеклото на експлозивната направа и начинот на кој таа завршила во таванот на станот.
