Серија пожари избувнаа на повеќе локации во Босна и Херцеговина, Република Српска и Црна Гора, а големиот пожар во БиХ предизвика проблеми и во Хрватска. Густиот чад утрово стигна до делови од Далмација, каде што видливоста е значително намалена, а жителите пријавуваат силен мирис на гареж.
Во Босна и Херцеговина во гаснењето на пожарите се ангажирани хеликоптери на вооружените сили, кои дејствуваат на подрачјата на Бихаќ, Калесија, Дрвар и Прозор-Рама. Во Бихаќ на терен се распоредени и околу 30 припадници на вооружените сили, соопшти Министерството за одбрана на БиХ.
Ангажирањето на хеликоптерите го наредил министерот за одбрана Зукан Хелез, откако Претседателството на БиХ дало согласност за користење на ресурсите на вооружените сили. Воздухопловите се користат според приоритетите и условите за безбедно дејствување од воздух, особено поради тоа што пожарите избувнале истовремено на повеќе места.
Во Република Српска активен е пожарот во реонот на Рајаково Брдо кај Мркоњиќ Град. Огнот зафатил сува трева, ниска вегетација и дел од високата шума, а во гаснењето се вклучени доброволни пожарникари, работници од шумското стопанство и полицијата.
Пожарот кај Теслиќ во меѓувреме е локализиран, но пожарникарите, шумарите и локалното население остануваат на терен. Нови пожари засега не се пријавени, но силниот ветер дополнително ја отежнува ситуацијата.
Голем пожар избувнал и во Остојиќи, во подрачјето на Трново во Сараевскиот кантон. Интервенцијата е отежната поради непристапниот и миниран терен, но од Сараевската професионална противпожарна бригада соопштија дека пожарот е ставен под контрола. Во гаснењето учествуваат три екипи со три возила, доброволното противпожарно друштво од Трново и работници на „Сараево-шуми“.
Иако куќите не се директно загрозени, пожарот придонел за влошување на квалитетот на воздухот во делови од Сараевскиот кантон.
Сериозна е состојбата и во Црна Гора. Во општина Никшиќ пожарите се активни на повеќе места, а силниот ветер го отежнува нивното гаснење.
Нови пожари, за кои постојат сомневања дека се подметнати, избувнале во подрачјето Бањани, во селата Кленак и Почековиќи, како и кај Враќеновиќи. Поради силниот ветер, пламените јазици брзо се приближиле до куќи, гробишта и црква, но пожарникарите засега успеваат да ги одбранат објектите.
Командирот на Службата за заштита и спасување, Славко Тадиќ, состојбата ја опишал како хаотична.
Пожарот продолжува и на планината Маганик, над Вељи Дубок, каде што огнот зафатил густа зимзелена шума на исклучително тешко пристапен терен.
Во меѓувреме, последиците од пожарите во БиХ се почувствувале и во Хрватска. Чадот бил пренесен до делови од Далмација, каде што жителите на повеќе места на крајбрежјето, островите и далматинското Загорје утрово пријавиле густа магла и чад, намалена видливост и силен мирис на гареж.
Фотографиите од различни делови на Далмација покажуваат заматен хоризонт, едвај видливи контури на ридовите и населените места, како и море прекриено со сивкаста измаглица.
Поради силниот мирис на чад, дел од граѓаните стравувале дека пожар избувнал во нивна непосредна близина и ги контактирале пожарникарските служби. Сепак, според добиените информации, чадот не потекнува од пожар во Далмација, туку е донесен од големиот пожар што беснее во БиХ.
Воздушните струења го пренеле чадот преку значителен дел од Далмација, предизвикувајќи намалена видливост и непријатен мирис во повеќе подрачја.
