Училишта низ Србија денеска добија дојави за наводно поставени бомби, поради што учениците беа евакуирани, а наставата прекината во повеќе градови. Полициски екипи излегоа на терен и вршат проверки на училишните објекти за да утврдат дали постои каква било опасност.
Во Лесковац беа евакуирани учениците од пет основни и едно средно училиште. Од локалната полициска управа потврдија дека заканите, како и во претходните слични случаи, биле испратени преку електронска пошта.
Меѓу образовните институции во кои наставата била прекината се Музичкото училиште во Лесковац и Основното училиште „Светозар Марковиќ“ во Вучје.
Закани за поставени експлозивни направи пристигнале и во бројни основни и средни училишта во Јужнобачкиот округ. Пораките биле испратени на официјалните електронски адреси на училиштата, по што надлежните служби презеле мерки за проверка.
Наставата била прекината и во неколку училишта во Белград, додека во Нови Сад, поради слична дојава, било евакуирано Основното училиште „Вук Караџиќ“.
Полициските проверки треба да утврдат дали дојавите имаат реална основа. Додека траат проверките, во погодените училишта наставниот процес е прекинат, а безбедноста на учениците и вработените е во фокусот на надлежните служби.
