Обилните дождови и интензивните поројни врнежи предизвикаа поплави и сериозни проблеми во сообраќајот во јужниот дел на Италија, при што меѓу најпогодените подрачја се Неапол и Бриндизи. Поради невремето, во 46 општини во регионот Кампанија е донесена мерка за затворање на училиштата.
Портокаловиот метеоролошки аларм за опасни временски услови останува на сила до 15 часот за Неапол, Кампаниската Рамнина, подрачјето околу вулканот Везув и островите во Неаполскиот Залив. За другите области е издадено жолто предупредување, пренесува „Аднкронос“.
Во Неапол, најголемите проблеми со поплавите се регистрирани во западниот дел на градот, особено во подрачјето меѓу населбите Фуоригрота и Бањоли. Водата предизвикала тешкотии на улиците, а службите за итни интервенции биле ангажирани на повеќе локации.
Противпожарните екипи интервенирале во неколку општини за да ги отстранат последиците од невремето и да им помогнат на возачите чии возила останале заглавени поради надојдената вода.
Во населбата Мелито, пожарникарите работеле на отстранување на олуци и нестабилни делови од ѕидови кои претставувале потенцијална опасност за минувачите и околните објекти.
Сериозноста на временските услови била причина да се одржи состанок на координативниот центар за вонредни ситуации. Состанокот бил организиран по силните поројни дождови што го зафатиле поширокото градско подрачје, со посебен акцент на општините Арцано, Грумо Невано и Џулијано.
Проблеми предизвикани од обилните врнежи се регистрирани и во Бриндизи. Тамошните противпожарни екипи уште од синоќа работат на санирање на последиците од невремето, испумпување на водата од поплавените површини и обезбедување на деловите од градот каде што постои опасност.
Меѓу поплавените локации е и подвозник наменет за пешаци.
Утрово, пожарникарите биле повикани и на регионалниот пат 50, на делницата меѓу Франкавила Фонтана и Вила Кастели, каде што се случила сообраќајна несреќа во која учествувал автомобил.
Возачот бил спасен и пренесен во болница пред да пристигнат противпожарните екипи на местото на несреќата.
Надлежните служби продолжуваат со интервенциите во погодените подрачја, додека метеоролошките предупредувања остануваат на сила во делови од регионот.
