Замислете дека патувате низ Европа и одеднаш асфалтот исчезнува, патот се претвора во прашлив макадам, а пред вас се појавува стар дрвен мост што изгледа како да ќе се распадне под сопствената тежина. Нема заштитна ограда, нема простор за грешка, а под вас – длабок кањон. И токму тука треба да помине автомобил, па дури и автобус полн со патници.
Иако звучи како сцена од некоја далечна, неразвиена земја, ова е реалност во срцето на Балканот. Граничниот премин Шќепан Поље, меѓу Босна и Херцеговина и Црна Гора, со години важи за еден од најопасните гранични премини во Европа – ако не по официјална статистика, тогаш сигурно по чувството на страв што го остава кај секој што ќе се осмели да го премине.
Границата се наоѓа над спектакуларниот, но застрашувачки кањон на реката Тара. Мостот, изграден од дотраени дрвени штици и ‘рѓосана метална конструкција, изгледа како привремено решение што никогаш не било заменето со трајно. Со години токму по овој мост минуваат не само автомобили, туку и тешки автобуси, што дополнително ја зголемува опасноста.
Преминот одамна има лоша репутација. Возачите кои ја познаваат состојбата често го избегнуваат, дури и ако тоа значи десетици километри подолг пат. Во еден период, фотографиите и видеата од мостот станаа вирални на социјалните мрежи, каде што корисниците го нарекоа „граничен премин од хорор-филм“.
Сепак, по години предупредувања и реакции од јавноста, конечно се појави надеж дека опасноста ќе стане минато. Министерот за комуникации и транспорт на Босна и Херцеговина, Един Форто, објави дека се целосно обезбедени средства за изградба на нов меѓудржавен мост над реката Тара, како и повеќе од 15 километри пристапен пат на рутата Сараево – Подгорица преку Шќепан Поље.
Според најавите, почетокот на градежните работи се очекува кон средината на 2026 година. До тогаш, Шќепан Поље останува симбол на запоставената инфраструктура на Балканот – и граница која и понатаму ги тестира нервите и храброста на патниците.
