Словенија најави голема промена во образовниот систем со која сегашното деветгодишно основно образование треба да биде заменето со осумгодишен модел. Реформата е планирано да започне од учебната 2028/2029 година.
Причина за најавените промени се резултатите од истражувањето ПИСА 2025, кои покажале пад на постигнувањата кај словенечките 15-годишни ученици во трите области што се оценуваат – читање, математика и природни науки.
Според новиот концепт, иако основното училиште би траело осум години, вкупниот број задолжителни години во образованието ќе остане девет. Причината е што сегашното прво одделение треба да биде заменето со задолжителна предучилишна година, која би се реализирала во градинка или во училиште.
Реформата предвидува и целосно нови наставни програми. Еден од приоритетите ќе биде учениците да стекнуваат основни писмености уште порано, а посебно внимание ќе се посвети на оние кои имаат потешкотии и заостануваат во совладувањето на материјалот.
Паралелно со тоа, се предвидува и поголема поддршка за надарените ученици, со цел нивните способности и потенцијали да бидат подобро препознаени и развивани во текот на образованието.
Промени се најавуваат и во начинот на кој се проверува знаењето. Новиот модел треба да донесе различни стандарди за оценување, како и промени поврзани со матурскиот систем.
Најавата за укинување на досегашниот деветгодишен модел предизвика реакции и кај дел од образовната заедница. Здружението на директори и Советот на родители побарале пред воведувањето на вакви значајни промени да се направи детална анализа и евалуација на досегашниот деветгодишен систем.
Од Министерството за образование најавиле формирање стратешки совет, кој треба да ги разработи сите детали поврзани со реформата и да го подготви новиот образовен модел за негово планирано воведување во учебната 2028/2029 година.
Така, доколку реформата биде реализирана според најавениот план, словенечките ученици во иднина ќе имаат осумгодишно основно образование, надополнето со една задолжителна предучилишна година, со што вкупниот број задолжителни години во образованието ќе остане девет.
