Вооружен инцидент вечерва ја вознемири јавноста во Сараево, откако маскирано лице испукало повеќе куршуми кон угостителски објект на Башчаршија, јавуваат босанските медиуми.
Според првичните информации, пукањето се случило околу 19:25 часот во улицата „Кундурџилук“, една од најпосетените улици во стариот дел на градот.
Како што пренесува „Аваз“, напаѓачот бил со фантомка и ракавици и пукал кон познат наргиле-бар во кој во тој момент имало гости. На улицата, исто така, се движеле бројни граѓани и туристи, поради што настанала паника меѓу присутните.
Полициските екипи веднаш пристигнале на местото на настанот и ја затвориле улицата за време на увидот. Во тек е истрага за утврдување на сите околности, како и за идентификација на напаѓачот и мотивот за нападот.
Според досегашните информации, нема повредени лица, а надлежните најавуваат дека повеќе детали ќе бидат познати по завршувањето на полициската истрага.
