Пожарите во Црна Гора и понатаму предизвикуваат големи проблеми, иако ситуацијата во Чањ и Буљарица вчера изгледаше под контрола. Утрово огнот повторно се разгоре, а над Петровац беа забележани вознемирувачки сцени – густ чад ја прекри познатата плажа.
Од 11 август 2025 година земјата се соочува со серија шумски пожари, најкритично меѓу Буљарица и Чањ. Оганот започнал поради запален автомобил на автопатот кај местото Куфин, а силните северни ветрови придонеле за брзото ширење низ густата вегетација.
Во Чањ избувнал голем пожар, при што чадот се насочил и кон плажите. На видеата се гледаат туристи кои, и покрај опасноста, сè уште седат под лежалки или пливаат, додека во позадина се издигнува густиот облак.
Огнот стигнал и до Бар, а од Буљарица беа прикажани драматични снимки од воздушното гаснење на пожарот.
