Грчките власти донесоа одлука да се суспендираат сите активности што водат до лиценцирање на кантините за храна, баровите на плажа и изнајмувањето лежалки на заштитените плажи на островите Куфонисија. Овој потег следеше по интервенцијата на министерот за национална економија и финансии, Киријакос Пјеракакис, кој одговори на итно барање од локалната општина за заштита на плажите Пори и Италијада во Ано Куфонисија, познати по својата исклучителна природна убавина и еколошка чувствителност.
Суспензијата претставува победа за жителите и локалните власти, кои беа загрижени за потенцијалното деградирање на овие недопрени брегови. Одлуката на Пјеракакис ја поддржува идејата дека овие области треба да се сметаат за „негазени плажи“, каде што организираната комерцијална активност е строго забранета, пренесе Грик Репортер.
МИРЕН РАЈ ВО ЕГЕЈОТ
Куфонисија е мала, спокојна островска група во Малите Киклади во источниот дел на Егејското Море, со прекрасни тиркизни води, бели песочни плажи и опуштена атмосфера. Главниот остров, Ано Куфониси, е населено со варосувано село, пристаниште, хотели и ресторани. Ненаселениот Като Куфониси е идеален за диви и затскриени плажи, достапен со кратко патување со брод од Ано Куфониси.
Туристите можат да уживаат во пешачење низ целиот остров (околу 3 часа за целосно истражување), пливање во природни морски базени како „Ѓаволското око“ и откривање на морски пештери. До островите се стигнува со ферибот од Пиреја (4,5–9 часа) или преку дневни линии од Наксос, Парос или Санторини.
ПОБЕДА ЗА ЛОКАЛНИТЕ ЖИТЕЛИ
Грчките власти формално ја одобрија иницијативата поднесена од Општина Наксос и Мали Киклади за блокирање на комерцијалното окупирање на овие плажи. Одлуката се очекува да биде официјално објавена денес на вонредна седница на Општинскиот совет.
Иако жителите ја прославија оваа мерка, тие ја гледаат како прв чекор. Целта останува трајна заштита на плажите преку формален статус на „негазени“, поставувајќи позитивен преседан за запирање на прекумерната експлоатација низ цела Грција, особено на локации интегрирани во мрежата Натура 2000.
