Најмалку 29 лица го загубија животот, а околу 40 се водат како исчезнати по катастрофалните свлечишта предизвикани од поројни дождови во југоисточниот дел на Бразил. Најтешко погоден е градот Хуиз де Фора, во сојузната држава Минас Жераис, кој се претвори во епицентар на трагедијата, пренесе BBC.
Во населбата Парк Бурние, сместена на рид над градот со околу 540.000 жители, свлечиште уништи десетина куќи. Пожарникарите извлекоа тела од калта и урнатините, а бројот на жртви во оваа област се искачи на најмалку 22. Уште седум лица загинаа во поплави и лизгање на земјиштето во соседниот град Уба.
Градоначалничката на Хуиз де Фора, Маргарида Саломао, прогласи состојба на катастрофа во раните утрински часови, оценувајќи ја ситуацијата како „сериозна“ поради интензивните и постојани врнежи што предизвикале околу 20 свлечишта. Градот го бележи највлажниот февруари во својата историја, со 584 милиметри дожд – двојно повеќе од просекот за цела година.
Сликите од теренот сведочат за размерите на трагедијата. Многу од жртвите биле затекнати во своите домови, изјави шефот на противпожарната служба Деметриус Гуларт. Роднини очајно чекаат вести за најблиските. Вилтон Апаресидо де Соуза, 42-годишен жител, изјави дека неговиот 20-годишен син останал под урнатините на срушената куќа, надевајќи се барем на можност достоинствено да го погреба.
Меѓу присутните е и Клејтон Хонан, кој изјави дека речиси сите затрупани во едно од свлечиштата се негови роднини. Спасувачките екипи работат без прекин, а секое запирање на механизацијата ја зголемува тишината и неизвесноста меѓу насобраните жители.
Координаторот за цивилна заштита во Минас Жераис, Пауло Хуберто Бермудез Хезенс, предупреди дека како што минуваат часовите, шансите за пронаоѓање преживеани се намалуваат. Операциите се дополнително отежнати од ризикот од нови свлечишта и поплави, како и од излевањето на реката Параибо, што ја зголемува нестабилноста на теренот.
Властите ги затворија училиштата во погодените подрачја, додека жителите на мобилните телефони снимаа драматични сцени на уривање на објекти во рок од неколку секунди.
Бразилскиот претседател Луиз Инасио Лула да Силва изјави дека приоритет е обезбедување хуманитарна помош, обновување на основните услуги, поддршка за раселените лица и реконструкција на уништените подрачја.
Оваа трагедија е дел од низа екстремни временски катастрофи што ја погодуваат земјата во последните години. Во 2024 година, поплавите на југот од Бразил однесоа повеќе од 200 животи и погодија околу два милиони луѓе. Во 2022 година, силна бура во Петрополис, во државата Рио де Жанеиро, одзеде 241 живот. Експертите предупредуваат дека зачестеноста и интензитетот на ваквите катастрофи се поврзани со последиците од климатските промени, кои сè почесто носат разорни врнежи и нестабилност на почвата.
Трагедијата во Минас Жераис уште еднаш покажа колку природните сили можат за кратко време да претворат цели населби во урнатини и да остават зад себе болка, загуби и неизвесност за десетици семејства.
