Пет лица се уапсени во Србија во рамки на продолжението на полициската акција „Армагедон“, поради сомнение дека биле вмешани во кривични дела поврзани со сексуална експлоатација на деца преку интернет и сексуално вознемирување. Српското Министерство за внатрешни работи соопшти дека против уште едно лице е поднесена кривична пријава, но постапката за него ќе се води во редовна процедура.
Приведените лица се од Белград, Прокупље, Суботица и Сремска Митровица. Според досегашните сознанија на полицијата, тие подолг период преку различни интернет-апликации преземале, чувале и споделувале фотографии и видеозаписи поврзани со сексуална злоупотреба и експлоатација на деца.
Истрагата покажала и дека дел од осомничените користеле лажни профили на социјалните мрежи за да воспоставуваат контакт со малолетници. Преку таквите профили, според сомнежите, им испраќале недозволени содржини и се обидувале да прибават материјали со нивна сексуална експлоатација.
При претресите во домовите на осомничените, како и при проверката на компјутерите и другата електронска опрема, полицијата пронашла поголем број фотографии и видеозаписи. Биле откриени и пораки со сексуална содржина за кои постои сомнение дека биле користени во комуникација со деца и малолетни лица и за нивно вознемирување.
Особено внимание во истрагата привлекол еден од осомничените, кој наводно користел лажни профили за комуникација со повеќе малолетни лица од Србија. Кај него биле пронајдени материјали и комуникации со повеќе деца, а во еден од случаите, според полициските сомнежи, тој стапил во контакт со дете и побарал од него да испрати експлицитни фотографии.
Петтемина уапсени се задржани до 48 часа. По истекот на мерката, тие со кривични пријави ќе бидат изведени пред надлежното обвинителство. За шестото лице, против кое е поднесена кривична пријава, постапката ќе продолжи во редовна процедура.
Министерот за внатрешни работи во технички мандат, Ивица Дачиќ, посочи дека зад секоја фотографија или видеозапис поврзан со сексуална експлоатација стои дете кое било жртва на злоупотреба. Тој нагласи дека со понатамошното споделување на таквите материјали дополнително се нарушуваат приватноста и достоинството на децата.
Дачиќ ги повика родителите и старателите отворено да разговараат со децата за нивната комуникација преку интернет и да ги охрабрат без страв да пријават какви било вознемирувачки пораки, контакти или барања за интимни фотографии.
Министерот апелираше сомнителните материјали да не се проследуваат до други лица, туку веднаш да се пријават во полиција.
Акцијата била реализирана од припадници на српското Министерство за внатрешни работи, Управата за техника и Службата за борба против високотехнолошкиот криминал. Постапката е спроведена по налог на Вишото јавно обвинителство во Белград, во соработка со повеќе полициски управи и Управата за гранична полиција.
