Македонските граѓани кои планираат да патуваат кон Халкидики, Солун, солунскиот аеродром или да се враќаат кон Македонија преку Евзони, треба да сметаат на значителни сообраќајни измени викендов.
Според најавите од грчките власти, солунската обиколница ќе биде целосно затворена за сообраќај во двата правци во ноќта меѓу сабота (1 август) и недела (2 август), во периодот од 23:00 до 05:00 часот.
Причина за затворањето се градежни активности поврзани со изградбата на новиот надвозник во рамките на инфраструктурниот проект Fly Over.
За време на затворањето, возилата што се движат кон Халкидики и аеродромот во Солун ќе бидат пренасочувани низ градските улици на Солун, додека возачите кои патуваат кон граничниот премин Евзони ќе користат алтернативни градски булевари.
Надлежните апелираат возачите внимателно да ја следат привремената сообраќајна сигнализација, да ги почитуваат насоките на грчката полиција и да предвидат дополнително време за патување поради можни застои.
