Единаесетгодишниот Кај Павловиќ, момчето родено и израснато во Херцег Нови, Црна Гора, е пронајден мртов по повеќе од една година потрага. Канадската полиција соопшти дека за неговата смрт се обвинети 51-годишниот Бранко Бијелиќ и 46-годишната Сара Бијелиќ.
Бранко Бијелиќ, од градот Барнаби во канадската провинција Британска Колумбија, е обвинет за убиство од втор степен и сквернавење човечки останки, додека Сара Бијелиќ се товари за убиство од небрежност.
Полицијата потврдила дека двајцата обвинети се членови на семејството на момчето и дека живееле заедно со него, но не открила каква точно роднинска врска имале. Канадските медиуми ја идентификувале Сара Бијелиќ како мајка на детето.
Потрагата започнала по повик за проверка на безбедноста на момчето
Според соопштението на Интегрираниот тим за истраги на убиства (IHIT) при Кралската канадска коњичка полиција, на 26 септември 2025 година полицијата во Барнаби добила барање да провери дали Кај е жив, безбеден и дали е добро. Било познато дека момчето живее со своето семејство во овој град.
Полициските службеници не успеале да го пронајдат во текот на неколку дена, по што истрагата била подигната на повисоко ниво и случајот бил третиран како потрага по високоризично исчезнато лице.
Потоа истрагата ја презела единицата за тешки кривични дела на полицијата во Барнаби. По повеќемесечна работа, на 25 јуни 2026 година случајот го презел IHIT. Истрагата на крајот довела до пронаоѓање на посмртните останки на момчето.
Семејството не знаело каде се наоѓа Кај
Кај Павловиќ е роден и израснат во Херцег Нови, каде што живеел со семејството и посетувал училиште.
По смртта на неговиот биолошки татко Саво, кој починал во февруари 2021 година од последици поврзани со ковид, момчето во ноември истата година се преселило со мајка му на Нов Зеланд. Таму живееле до 2023 година, кога заминале во Британска Колумбија, Канада.
Според медиумските информации, Сара во 2024 година накратко се вратила на Нов Зеланд, каде што родила ќерка што ја има со Бранко Бијелиќ. Потоа повторно заминала во Канада.
Во септември 2025 година Сара пристигнала во Херцег Нови заедно со Бранко и нивната мала ќерка, но без синот. Неговото отсуство предизвикало загриженост кај роднините од страната на неговиот покоен татко, кои се обидувале да дознаат каде се наоѓа момчето.
Откако подолго време немале никакви вести за Кај, членовите на семејството се обратиле до канадската полиција. Според истражителите, ваквиот прекин на контактот бил невообичаен. Медиумите наведуваат дека семејството покренало и постапка преку Интерпол, доставувајќи информации до надлежните институции што можеле да помогнат во истрагата.
Според медиумските наводи, во периодот околу исчезнувањето, мајката на Кај им кажала на роднините дека момчето го оставила на чување кај дадилка. Полицијата претходно соопштила дека истражителите верувале оти детето престојувало кај лице кое се грижело за него, чиј идентитет се обидувале да го утврдат.
Полицијата: Не станува збор за случаен инцидент
Наредничката Фреда Фонг од IHIT изјавила дека истрагата била долготрајна и емоционално тешка, а подигнувањето на обвиненијата претставува значаен чекор по повеќе од една година работа.
– Свесни сме за загриженоста што оваа истрага ја предизвика во заедницата. Нашите мисли се со најблиските на Кај и со сите што се погодени од оваа трагедија – изјавила Фонг.
Таа посочила дека полицијата сака јавноста да добие одговори по долгиот период на неизвесност, во кој многумина биле загрижени за судбината на момчето.
Според неа, обвинетите биле поврзани со Кај, а истражителите сакале да нагласат дека не станува збор за случај во кој бил вклучен непознат сторител, ниту за случаен чин.
Бидејќи предметот сега е пред суд, од IHIT соопштиле дека нема да објавуваат дополнителни информации за истрагата.
Подигнувањето на обвиненијата е означено како пресвртница во случајот што повеќе од една година предизвикувал загриженост кај семејството и заедниците во Канада, Црна Гора и Нов Зеланд.
Семејството сака момчето да почива покрај својот татко
Роднините на единаесетгодишниот Кај Павловиќ започнале акција за собирање средства со цел неговото тело да биде пренесено во Црна Гора, каде што сакаат да го погребаат покрај неговиот татко.
