Убедливата победа на опозициската Студентска листа на изборите во Србија не донесе само политички пресврт во Белград, туку отвори и сериозни прашања за долгогодишната политика на Европската Унија кон Александар Вучиќ.
Како што анализира „Политико“, Брисел повеќе од една деценија го сметал Вучиќ за незаменлив партнер, и покрај предупредувањата за нарушување на демократијата и владеењето на правото.
Со изборниот пораз на неговата Српска напредна странка, Европската Унија сега се соочува со нова политичка генерација која отворено ја доведува во прашање досегашната соработка.
„Вучиќ секогаш ги застапуваше сопствените интереси, а не интересите на Србија“, изјавил Југослав Гашиќ, иден пратеник од Студентската листа.
„Ни велеа дека нема алтернатива“
Претседателот на Управниот одбор на Центарот за европски политики, Срѓан Мајсторовиќ, предупредува дека Европската Унија го загубила кредибилитетот поради односот кон претходната власт.
Според него, претставници на граѓанските организации со години барале Брисел да разговара и со други политички и општествени фактори во Србија.
„Ни велеа дека во Србија не постои алтернатива за постојниот режим“, изјавил Мајсторовиќ.
Истражување на Центарот за европски политики покажало дека 41,6 проценти од граѓаните сметаат дека ЕУ повеќе се интересира за сопствените политички и економски интереси отколку за демократијата во Србија.
Новата власт не сака изолација
Иако Студентската листа ја признава Европската Унија како најважен економски партнер, нејзините претставници најавуваат преиспитување на досегашните односи.
„Не сакаме Европа да нè отфрли. Не сакаме да бидеме изолиран остров“, порачал Гашиќ.
Новата парламентарна мнозинска коалиција најавува враќање на владеењето на правото, институционални реформи и поинаков пристап кон меѓународните партнери.
Главното прашање што сега се поставува пред Брисел е зошто со години го поддржувал Вучиќ како клучен партнер, и покрај бројните предупредувања за состојбата на демократијата во Србија.
