Безбедносните сили во Уганда уапсиле маж осомничен дека во периодот од 2010 до 2025 година убил и изел дури 38 луѓе, а властите најавуваат јавно судење и барање смртна казна.
Станува збор за Мујуризи Мозес, кого командантот на одбранбените сили на Уганда, генерал Мухузи Кајнеругаба, го опиша како најстрашниот сериски убиец и канибал во историјата на земјата.
„Со задоволство ги известувам нашите граѓани дека безбедносните сили го уапсија злогласниот Мујуризи Мозес. Тој е најлошиот сериски убиец и канибал во историјата на Уганда. Убил и изел 38 луѓе меѓу 2010 и 2025 година“, објавил генералот.
Според властите, злосторствата биле извршени во окрузите Масака, Ибанда и Казо.
Напаѓал семејства и мамел жени
Според локалните медиуми, осомничениот често напаѓал цели семејства, провалувајќи во нивните домови вооружен со мачета.
Наводно имал и соучесници кои му помагале при нападите. Во еден од случаите, напаѓачите пробиле дупка во ѕидот на куќа на локален свештеник и ги убиле присутните.
Истрагата опфаќа и сомнежи дека Мозес мамел жени претставувајќи се како заинтересиран за љубовна врска, по што ги убивал.
Претходно бил апсен, но успевал да избега
Според објавените информации, Мозес и претходно бил приведуван, но успевал да избега или бил ослободуван.
Властите тврдат дека овојпат пронашле материјални докази во неговиот дом, а истражителите повторно разгледуваат и стари нерасчистени случаи на исчезнати лица.
Генералот најавил дека осомничениот ќе биде јавно суден и погубен.
Сепак, обвиненијата допрва треба да бидат докажани во судска постапка, а најавата за погубување не претставува донесена судска пресуда.
