Нови вознемирувачки детали излегуваат во јавноста за двете убиства во скопските населби Хром и Ѓорче Петров, во кои животот го загубија 62-годишен маж и 76-годишна жена.
Според неофицијални информации од извори во истрагата, четворицата приведени ги признале делата во полициска станица, а нивна мета биле повозрасни лица кои живееле сами.
Жртвите, според истите извори, биле врзувани и физички малтретирани, по што од нивните домови биле одземани пари и златен накит.
Министерството за внатрешни работи потврди дека на 27 октомври се приведени А.С. (22), Х.Е. (20) и К.А. (58), сите од Скопје, како и М.Р. (26) од Струмица.
Тие се осомничени за две разбојништва со смртни последици, извршени на 22 и 27 октомври.
Според неофицијалните сознанија, двајца од приведените учествувале во нападот врз 62-годишниот маж, додека тројца биле вклучени во нападот врз 76-годишната жена. Осомничениот од Струмица наводно бил возач на групата.
На местата на злосторствата, според истите информации, биле пронајдени и ДНК-траги што се испитуваат.
МВР соопшти дека во координација со Основното јавно обвинителство Скопје е побаран краткотраен притвор од 48 часа за комплетирање на доказите.
Од Обвинителството посочуваат дека доказите сè уште се прибираат и дека засега не е донесена наредба за спроведување истрага.
Се очекуваат и резултатите од обдукциите, додека надлежните проверуваат дали осомничените би можеле да бидат поврзани и со други кривични дела.
Информациите за признанијата и конкретниот начин на извршување засега се неофицијални, а вината на приведените не е утврдена со судска пресуда.
