Само неколку дена по изборната победа на Студентската листа и поразот на Српската напредна странка, во Србија започна опсежна контрола на обвинителствата, а претставници на победничкото движење најавуваат можност за апсења на високи државни функционери.
Врховната јавна обвинителка Загорка Доловац издала задолжително упатство за проверка на работата на сите 87 обвинителства во земјата.
Петчлена комисија веќе започнала со контрола во Вишото јавно обвинителство во Белград, предводено од Ненад Стефановиќ.
„Очекувам апсења во наредните денови“
Кандидатот на Студентската листа, Немања Ѓуриќ, во изјава за Н1 порача дека изборната победа создала услови обвинителите да работат без политички притисоци.
„Не сакаме едно политичко влијание врз правосудството да го замениме со друго. Не вршиме притисок врз обвинителствата, туку сакаме да испратиме порака дека сега можат да работат во согласност со законот“, изјави Ѓуриќ.
Тој додаде дека во наредните денови очекува одредени апсења на високи државни функционери.
Под лупа најконтроверзните случаи
Според српските медиуми, се проверуваат предмети поврзани со трагедијата во Нови Сад, наводната употреба на звучен топ на протестите во Белград, прислушувањето граѓани и постапувањето против студентски активисти.
Комисијата ќе ја испитува и законитоста на одредени спогодби за признавање вина.
Студентската листа бара независна истрага и за наводите за полициско малтретирање студентка, случај во кој се споменува полицискиот функционер Марко Кричак.
Обвинителството реагираше
Од Вишото јавно обвинителство во Белград потврдија дека на комисијата ѝ е овозможен пристап до побараната документација, но нагласија дека ова е четврта ваква контрола во последните две години.
Засега нема потврда дека се издадени налози за апсење. Најавите на Ѓуриќ претставуваат негови очекувања, додека евентуалната кривична одговорност ќе зависи од резултатите на проверките и одлуките на надлежните правосудни органи.
