Вознемирувачки инцидент се случил вчера во трговскиот центар „Космос“ во Солун, едно од најпосетуваните шопинг-места меѓу Македонците. Дел од таванската конструкција на првиот кат, во зоната каде што се наоѓаат рестораните, ненадејно се урнал додека во објектот имало голем број посетители.
Во несреќата е повредена 45-годишна жена која се здобила со повреди на главата и вратот. Според грчките медиуми, таа била свесна во моментот кога пристигнала брзата помош и веднаш била пренесена во болницата „Папаниколау“, каде ѝ била укажана медицинска помош.
На видеоснимките што се појавија на социјалните мрежи, направени само неколку моменти по инцидентот, може да се види урнатата конструкција на подот, како и посетители и вработени кои ѝ помагаат на повредената жена додека чекаат пристигнување на службите за итна помош.
Инцидентот предизвикал вознемиреност кај присутните, а дел од посетителите привремено биле евакуирани од тој дел на трговскиот центар. Надлежните служби веднаш излегле на терен и започнале истрага за причините за уривањето на таванот.
Трговскиот центар „Космос“ важи за омилена дестинација за шопинг и излегување, особено за граѓани од Македонија кои често го посетуваат Солун, што дополнително ја зголеми вниманието на јавноста кон овој настан. Надлежните најавуваат дополнителни проверки на безбедноста во објектот.
