Мал грчки остров со само неколку десетици жители започна необична, но сериозна акција за спас од целосно исчезнување. Антикитера, остров лоциран меѓу Крит и Пелопонез, нуди месечна финансиска поддршка од 500 евра, како и обезбедено сместување, за оние што се подготвени трајно да се преселат.
Со само околу 45 постојани жители, од кои повеќето се над 50-годишна возраст, островот се соочува со сериозен демографски колапс. Локалните власти, заедно со Грчката православна црква на Китира, решија да преземат конкретни чекори за оживување на заедницата.
Новите жители ќе добиваат по 500 евра месечно во период од три години, што значи околу 18.000 евра по семејство, како и бесплатно сместување и основна поддршка за живот. Програмата е насочена првенствено кон млади семејства и лица со практични занимања – пекари, рибари, занаетчии и луѓе со деца.
Целта не е само зголемување на бројот на жители, туку и зачувување на основните функции на островот – училиште, продавница, локална економија и секојдневен живот. Планирано е да бидат примени најмногу пет семејства, а кандидатите ќе поминат интервју пред конечен избор.
Иако најавени се и нови куќи, нивната изградба сè уште не е започната поради административни процедури. До островот се стигнува со ферибот, а иако животот таму е скромен, Антикитера има струја, интернет и основни услови за современо живеење.
За некои – ризик. За други – шанса за нов почеток.
