Поранешниот фризер на српската поп-ѕвезда Јелена Карлеуша, Матија Радуловиќ, почина на 6 јануари на 43-годишна возраст, а веста за неговата ненадејна смрт предизвика силен шок во јавноста, особено меѓу припадниците на естрадната и модната сцена, каде што со години беше присутен и високо ценет.
Во моментов кружат бројни шпекулации за причините кои довеле до трагичниот исход. Според неофицијални информации, можно е здравствените компликации да биле поврзани со одредени интервенции што Радуловиќ ги имал на лицето и телото во претходниот период. Сепак, точната причина за смртта сè уште не е утврдена и ќе биде позната по завршувањето на обдукцијата.
Непосредно пред драматичното влошување на здравствената состојба, Радуловиќ го прославил својот роденден во друштво на блиски пријатели. Според сведочењата на оние што биле присутни, ништо не укажувало дека се приближува трагедија.
– Огромна тага. Мојот најдобар пријател беше со него на роденденската забава. Матија беше насмеан, расположен и полн со идеи. Славеа до раните утрински часови, зборуваше за проширување на бизнисот и нови проекти. Непосредно пред тоа беше во Занзибар, каде што се разболе. По враќањето во Белград почувствува одредени тегоби, но не им придаде значење сè додека, за жал, не беше предоцна – изјавил извор близок до Радуловиќ за локалните медиуми.
Еден ден пред да биде префрлен во Итниот центар, поради влошената здравствена состојба била повикана Итна помош, но Радуловиќ тогаш одбил хоспитализација. По тој настан, се повлекол во својот стан и не излегувал, што, според извори, можело дополнително да ја влоши состојбата и да доведе до сериозни компликации.
Во понеделник околу 17:00 часот, неговата состојба нагло се влошила, по што Итната помош повторно интервенирала и го префрлила во болница. Во тој момент, тој веќе бил во критична состојба.
На Бадник, Матија бил без свест и во исклучително тешка здравствена состојба итно префрлен во Ургентниот центар. И покрај максималните напори на лекарскиот тим, неговиот живот не можел да биде спасен.
Матија Радуловиќ беше добро познато име во светот на убавината и шоу-бизнисот. Кариерата ја започнал како фризер, а пошироката јавност го запозна преку соработката со Јелена Карлеуша, која, според неговите пријатели, била првата јавна личност што му дала можност да се пробие и да се етаблира меѓу познатите.
Роден во 1983 година, Радуловиќ беше познат по својот талент, креативност и исклучителна работна етика. Со текот на годините стана еден од најбараните фризери во Србија, омилен меѓу јавните личности, но и меѓу пријателите, кои го опишуваат како човек со големо срце, позитивна енергија и неисцрпна животна сила, пренесува „Блиц“.
