Голема промена во раководството на Радио-телевизија Србија (РТС). Генералната директорка Мања Грчиќ поднесе оставка од функцијата, по зголемените притисоци и барањата за промени во јавниот сервис.
Во образложението на својата одлука, Грчиќ навела дека внимателно ги разгледала околностите во кои моментално функционира РТС и оценила дека нејзиното повлекување е во интерес на институцијата.
„Очекувам Управниот одбор, во рамките на своите законски надлежности, без одлагање да ги преземе сите потребни активности за обезбедување континуитет во раководењето и законско примопредавање на должноста“, навела Грчиќ.
Таа додала дека е подготвена да соработува за примопредавањето да помине без последици врз работата на јавниот сервис.
Оставката следува по барањата на студентите и вработените
Нејзиното повлекување доаѓа откако дел од вработените во РТС, заедно со кандидатите на Студентската листа, побараа оставки од раководството и уредниците на Информативната програма.
Интересно е што Грчиќ претходните денови одржала состанок со претставници на синдикатите, на кој, според медиумските извештаи, изјавила дека нема намера да поднесе оставка.
На функцијата помина само осум месеци
Мања Грчиќ беше именувана за генерална директорка на РТС на 11 февруари 2026 година, со петгодишен мандат, а должноста ја презеде на 25 февруари.
Таа стана првата жена на чело на српскиот јавен сервис.
Пред назначувањето работела во Би-би-си, Б92, Пинк и ТВ3 Словенија, а извршувала и раководни функции во Танјуг и медиумската групација „Антена“.
Нејзината оставка отвора ново прашање за идното раководство на РТС и промените што би можеле да следуваат во српскиот јавен сервис.
