Развојот на вештачката интелигенција би можел целосно да го промени светскиот пазар на трудот, а основачот на „Мајкрософт“, Бил Гејтс, предупредува дека следните две децении ќе донесат огромни промени во начинот на кој луѓето работат и живеат.
Неговите предвидувања доаѓаат во момент кога „Мајкрософт“ понуди доброволни отпремнини за приближно 60.000 вработени ширум светот.
Станува збор за програма што им овозможува на одредени категории вработени доброволно да ја напуштат компанијата со финансиска поддршка. Тоа не значи дека сите 60.000 работници ќе добијат отказ.
Кои работни места први ќе бидат погодени?
Според Гејтс, вештачката интелигенција најпрво силно ќе влијае врз канцелариските професии, каде што голем број задачи можат да бидат автоматизирани.
Со понатамошниот развој на роботиката, промените постепено ќе го опфатат и физичкиот труд.
Гостувајќи во емисијата на Џими Фалон, Гејтс на прашањето дали луѓето во иднина воопшто ќе бидат потребни одговорил:
„За повеќето работи нема да бидат.“
Сепак, тој нагласува дека технолошката можност за замена на човекот не значи дека општеството нужно ќе ја прифати таквата промена.
Огромни можности, но и сериозни ризици
Гејтс очекува вештачката интелигенција да донесе значителен напредок во медицината, образованието и земјоделството.
Истовремено, предупредува дека периодот на приспособување може да предизвика губење работни места и продлабочување на економските нееднаквости.
Како можни решенија ги споменува пократката работна недела и пораното пензионирање.
Во меѓувреме, „Мајкрософт“ продолжува со големи инвестиции во инфраструктура за вештачка интелигенција, додека паралелно се обидува да ги оптимизира трошоците.
Пораката на Гејтс е дека вештачката интелигенција нема само да ги промени професиите, туку и самото значење на работата во иднина.
