Министерството за финансии на Соединетите Американски Држави објави дека воведува санкции против седум лица поврзани со венецуелскиот претседател Николас Мадуро и неговото најтесно опкружување, вклучително и неговата сопруга.
Американскиот секретар за финансии Скот Бесант изјави дека Вашингтон нема да дозволи Венецуела да продолжи да биде извор на нелегална трговија со дрога која, како што рече, директно ја загрозува безбедноста на САД и поширокиот регион.
„Мадуро и луѓето околу него ја поткопуваат стабилноста на целата хемисфера. Администрацијата на претседателот Доналд Трамп ќе продолжи со решителна борба против мрежите кои ја поддржуваат оваа нелегитимна власт“, нагласи Бесант.
Од Министерството за информации на Венецуела засега нема официјален коментар во врска со воведените мерки.
Венецуелската влада, како и самиот Мадуро, во повеќе наврати ги отфрлија обвинувањата за криминални активности, тврдејќи дека станува збор за политички притисок од САД со цел уривање на владејачкиот режим и преземање контрола врз богатите нафтени ресурси на земјата.
