Американскиот претседател Доналд Трамп нареди „целосна и сеопфатна“ блокада на сите нафтени танкери што пловат кон или од Венецуела, по обелоденувањето дека владата на претседателот Николас Мадуро е прогласена за странска терористичка организација. Во објава на својата социјална мрежа Truth Social, Трамп го оправда овој потег со обвинувања за кражба на американски средства, шверц со дрога, трговија со луѓе и терористички активности.
„Венецуела е целосно опкружена со најголемата армада некогаш собрана во Јужна Америка. Сè додека нашите средства не бидат вратени, блокадата ќе продолжи“, напиша Трамп, додавајќи дека одземената нафта и ресурси мора да се вратат во Соединетите Држави и дека Америка нема да дозволи да биде ограбена или загрозена од криминалци и терористи.
Одлуката следува само една недела по запленувањето на нафтен танкер близу брегот на Венецуела. Каракас го осуди потегот како „гротескна закана“, а претседателот Мадуро обвини дека САД вршат киднапирање на екипажот и кражба на бродот. Тој додаде дека Венецуела е подготвена да ја брани својата територија и природни ресурси.
Во меѓувреме, Соединетите Држави го засилија военото присуство во Карипското Море, вклучително и позиционирање на најголемиот носач на авиони „УСС Џералд Форд“ во дострел на венецуелската територија. Новата блокада предизвика и реакции во американската политика: демократот Хоакин Кастро ја оцени како „чин на војна“ и најави резолуција во Конгресот со која ќе се бара прекин на непријателствата со Венецуела.
