Украинскиот претседател Володимир Зеленски ги повика западните сојузници да ја засилат поддршката за Украина и да покажат на Русија дека продолжувањето на војната е бесмислено, пред важниот самит на Европската унија на кој ќе се разговара за замрзнатите руски средства.
„Исходот од овие состаноци мора да покаже на Русија дека нејзината намера да продолжи со борбите следната година е без резултат, затоа што Украина ќе ја има поддршката на меѓународната заедница“, нагласи Зеленски во вечерашното обраќање.
Тој ја повика ЕУ да донесе одлука за користење на речиси 250 милијарди долари замрзнати руски државни средства, од кои најголемиот дел се чуваат во белгискиот Euroclear, за финансиска поддршка на Украина. Минатата недела владите на ЕУ се согласија средствата да останат замрзнати до понатамошно известување, наместо на секои шест месеци да се одлучува за статусот, додека некои европски лидери изразија страв од можни правни ризици.
„Потребна ни е храброст од сите наши партнери да ја согледаат вистината и да дејствуваат соодветно“, додаде Зеленски, истакнувајќи дека постапките на Русија покажуваат намерата да ја продолжи војната и следната година.
Украинскиот претседател посочи дека и покрај тврдењата на некои западни лидери дека Русија сака да ја заврши војната, официјалните наредби и реториката на Москва укажуваат на сосема спротивно.
