Рускиот претседател Владимир Путин денеска не најави никакви промени во руските услови за завршување на војната во Украина, истовремено обвинувајќи ја Европската Унија дека се обидува да присвои руски средства „на сред бел ден“.
Говорејќи на својата традиционална годишна прес-конференција и „директна линија“ со граѓаните, која траеше речиси четири и пол часа, Путин порача дека следниот чекор кон мирот не зависи од Москва, туку од Украина и европските земји.
„Претседателот Доналд Трамп вложува сериозни и искрени напори за да се стави крај на конфликтот“, изјави Путин, додавајќи дека Русија е подготвена за разговори и мирно решение, но дека одговорноста е кај „киевскиот режим и неговите европски спонзори“.
Иако Трамп јавно се залага за мировен договор, Украина и нејзините сојузници во Европа стравуваат дека евентуалниот договор би бил во корист на Русија. Киев, пак, повеќепати нагласи дека не му верува на Путин и бара безусловен прекин на огнот.
Калининград како точка на тензии
Путин предупреди дека секој обид за блокада на руската ексклава Калининград би довел до сериозна ескалација и ризик од „конфликт од големи размери“. Москва тврди дека Западот се обидува да го изолира регионот, кој се наоѓа меѓу Полска и Литванија – членки на НАТО и ЕУ, и каде е стационирана Балтичката флота на Русија.
Непроменети услови за прекин на војната
Рускиот претседател повтори дека Москва би била подготвена веднаш да ги запре воените дејства доколку добие безбедносни гаранции. Тој нагласи дека Русија нема планови да ја напаѓа Европа, но инсистира на условите изнесени уште во јуни 2024 година – Украина да се откаже од членство во НАТО и да се повлече од четирите региони кои Русија ги смета за своја територија.
Украинските власти, од друга страна, јасно порачуваат дека нема да се откажат од делови од земјата кои руските сили не успеале целосно да ги освојат за време на речиси четиригодишната војна.
Критики за замрзнатите руски средства
Путин зборуваше и за одлуката на Европската Унија да се откаже од планот директно да ги користи замрзнатите руски средства за помош на Украина, и наместо тоа да обезбеди заем. Лидерите на ЕУ, сепак, најавија дека го задржуваат правото тие средства да бидат искористени за отплата доколку Русија не плати воени отштети.
„Ова не е кражба – ова е грабеж сред бел ден“, рече Путин, оценувајќи дека угледот на ЕУ како безбедно место за чување капитал веќе е сериозно нарушен.
Бизарни моменти и пораки од граѓаните
Иако темата Украина доминираше, настанот беше проследен и со необични моменти. На голем екран беа прикажувани пораки од граѓани кои се жалеа на скап живот, лоша инфраструктура, прекини на интернет и проблеми со водоснабдувањето.
Кремљ соопшти дека за прес-конференцијата биле пристигнати над 2,6 милиони прашања. Путин, кој има 73 години, во еден момент потврдно одговори дека е вљубен, но без дополнителни детали, а откри и дека понекогаш инкогнито се вози низ Москва за да ја почувствува реалната состојба во земјата.
