До дипломатско-конзуларното претставништво во Тел Авив, досега единаесет македонски државјани официјално побарале евакуација поради безбедносната состојба во Израел.
Воздушниот простор останува затворен најмалку до понеделник, а по неговото повторно отворање ќе се разгледаат можностите за организирана евакуација во согласност со околностите и безбедносните протоколи.
Државјаните се советуваат внимателно да ги следат официјалните известувања на израелските власти и да се придржуваат до безбедносните препораки, вклучително и да остануваат во засолништа кога тоа е наложено.
Во дипломатско-конзуларните претставништва во Доха и Абу Даби, заклучно со овој момент, нема ниту еден македонски државјанин кој побарал евакуација.
Министерството за надворешни работи и надворешна трговија, преку амбасадите и дежурните служби, е во континуирана комуникација со македонските државјани и целосно на располагање за помош и координација.
Министерот Тимчо Муцунски, преку социјалната мрежа X, ја истакна поддршката за сојузничката координација и важноста на заеднички пристап за одржување на регионалната безбедност и стабилност.
