Италијанската премиерка Џорџа Мелони најави строги мерки против насилството на улиците, со кои се предвидуваат затворски казни за учесниците во насилни протести, парични казни за родителите на малолетните сторители и дополнителни овластувања за полицијата.
Италијанската влада на 20 октомври одобри нова безбедносна уредба, како одговор на неодамнешните немири во Милано и други градови, каде што беа ограбувани продавници, уништуван имот и забележани жестоки судири со полицијата.
Според објавените податоци, за време на немирите во Милано биле приведени околу 270 лица, од кои приближно 80 проценти биле малолетници.
Мелони порача дека државата нема да толерира насилство и уништување на јавниот и приватниот имот.
„Протестирањето е право, но палењето на нашите градови не е“, порача италијанската премиерка.
Затвор до пет години и казни од 20.000 евра
Една од најважните промени е воведувањето ново кривично дело за насилно учество во јавни собири.
Според одобрените мерки, лицата кои за време на демонстрации учествуваат во групи од најмалку петмина и фрлаат камења, петарди или користат палки, загрозувајќи ја безбедноста на другите, можат да се соочат со затворска казна од две до пет години и парична казна до 20.000 евра.
Построги санкции се предвидуваат доколку сторителите ги прикриваат лицата, предизвикаат повреди или учествуваат во организирано уништување имот.
Особено високи казни се предвидени за лицата кои организираат насилни групи, вклучително и преку социјалните мрежи. За вакви дела се предвидува затвор од четири до дванаесет години.
Родителите ќе плаќаат за постапките на своите деца
Една од мерките што предизвикаа најголемо внимание е воведувањето финансиска одговорност за родителите чии малолетни деца учествуваат во насилство и вандализам.
Според новите правила, родителите можат да бидат казнети со суми од 500 до 1.000 евра, а при повторување на прекршокот казните можат да бидат двојно поголеми.
Покрај тоа, предвидена е и можност за наплата на материјалната штета предизвикана од малолетниците, со соодветна законска постапка.
„Кој уништува, плаќа. А ако уништува малолетник, плаќаат неговите родители“, порача Мелони.
За малолетниците постари од 14 години се предвидува и промена во начинот на утврдување на кривичната одговорност. Нивната способност да ги разберат своите постапки ќе се претпоставува, освен ако одбраната не докаже спротивно.
Полицијата ќе може превентивно да задржува малолетници
Новата уредба предвидува проширување на можноста за превентивно полициско задржување на лица за кои постојат законски утврдени безбедносни ризици.
Оваа мерка ќе може да се применува и врз малолетници кои наполниле 16 години, под определени услови.
Италијанските власти најавуваат и проширување на капацитетите за сместување малолетни престапници, како и зголемување на бројот на судии задолжени за ваквите предмети.
Италијанскиот претседател се спротивставил на дел од мерките
Сепак, владата на Мелони не доби поддршка за сите предложени промени.
Италијанскиот претседател Серџо Матарела изразил резерви во однос на можноста војниците распоредени на улиците да добијат полициски овластувања, вклучително и овластување за апсење.
Поради тоа, спорниот дел бил изоставен од одобрената уредба.
Италијанската влада најави и распоредување дополнителни 500 војници во Милано за зајакнување на безбедноста.
Новите мерки отворија дебата во Италија за границата меѓу заштитата на јавниот ред и правото на протест. Владата смета дека построгите санкции се неопходни за спречување на насилството, додека критичарите предупредуваат на ризик од прекумерни ограничувања на граѓанските слободи.
Одобрената уредба треба да помине и низ парламентарна постапка, бидејќи италијанскиот систем предвидува ваквите владини акти да бидат претворени во закон во рок од 60 дена.
