Производството на оружје и муниција во Русија доживеало драматичен раст во последните години, достигнувајќи повеќе од 22-кратно зголемување, изјави денес рускиот претседател Владимир Путин. Ова зголемување, како што нагласи тој, е директно поврзано со потребите на конфликтот во Украина и со засиленото ангажирање на рускиот одбранбено-индустриски комплекс.
На состанокот посветен на државната програма за вооружување, Путин изјави дека руските воени компании во целост ја снабдуваат армијата со неопходното оружје, техника и опрема. Според него, навремено преземените мерки за државна поддршка овозможиле брзо зајакнување на материјално-техничката база на одбранбената индустрија и значително проширување на производствените капацитети.
Рускиот претседател истакна дека војната во Украина, која Москва ја нарекува „Специјална воена операција“, ѝ овозможила на армијата да стекне, како што рече, апсолутно непроценливо борбено искуство. Тоа искуство, според Путин, активно се користи за обликување на нова структура и нов модел на руските вооружени сили, но и за понатамошен развој на одбранбено-индустрискиот комплекс.
Тој прецизираше дека во споредба со 2022 година, производството на најбараната воена техника значително е зголемено. Производството на тенкови пораснало за 2,2 пати, на лесни оклопни возила како БМП и БТР за 3,7 пати, на воена авијациска опрема за 4,6 пати, а на моторни возила за 5,7 пати. Особено голем раст е забележан кај ракетно-артилериското оружје, чиј обем е зголемен за 9,6 пати, како и кај опремата за комуникација и радио-електронско војување, која е зголемена за 12,5 пати.
Дополнително, производството на средства за индивидуална оклопна заштита е зголемено речиси 18 пати, додека производството на оружје и муниција надминало повеќе од 22 пати во однос на претходниот период.
Путин нагласи дека ваков интензивен раст не би бил можен без стабилна економија и цврста финансиска состојба во земјата. Тој додаде дека карактерот, формата и методите на водење на борбените операции постојано се менуваат, што бара континуирано прилагодување и модернизација на вооружените сили.
На крајот, рускиот претседател истакна дека државата веќе има подготвено сеопфатен пакет мерки за спроведување на долгорочната програма за вооружување. Таа, според него, ќе обезбеди систематско зголемување на високотехнолошкото производство, максимална автоматизација на процесите, повисока продуктивност на трудот и истовремено намалување на трошоците за производство.
