Украинскиот претседател Володимир Зеленски најави дека Украина ќе увезува природен гас од Грција за да ги покрие енергетските потреби за време на зимата.
„Денес веќе го подготвивме договорот со Грција за гас за Украина, што ќе претставува уште една рута за снабдување и ќе обезбеди увоз за зимата“, напиша Зеленски на Телеграм, пренесува Ројтерс.
Тој додаде дека Украина обезбедила финансиски средства за увозот, кои ќе изнесуваат скоро две милијарди евра, со цел надоместување на загубите во домашното производство на гас предизвикани од руските удари.
Зеленски истакна дека средствата ќе дојдат од европски партнери и банки под гаранции на Европската комисија, како и од украинска банка, додека истовремено се соработува со американски партнери за целосно финансирање.
Најавената посета на Грција на Зеленски е дел од пошироката турнеја што ќе го одведе и во Франција и Шпанија, со цел зајакнување на енергетската сигурност и меѓународната поддршка за Украина.
