Напаѓачот кој синоќа предизвика инцидент за време на новинарска вечера во Вашингтон успеал да го заобиколи надворешниот безбедносен прстен благодарение на тоа што бил регистриран како гостин во хотелот Washington Hilton, потврдуваат официјални извори.
Станува збор за 31-годишниот Кол Томас Ален, кој веќе престојувал во хотелот во моментот кога објектот бил затворен за јавноста, неколку часа пред почетокот на настанот. Во тој период пристап имале само гости на хотелот, лица со влезници и акредитирани учесници.
Според полицискиот началник Џефри Керол, токму овој статус му овозможил на осомничениот да внесе оружје без да биде откриен во почетната фаза на контрола.
И покрај тоа, надлежните тврдат дека внатрешниот безбедносен систем функционирал според протоколите. Сите околу 2.300 гости биле проверени со повеќекратни контроли, вклучително и метал-детектори, што го спречило напаѓачот да влезе вооружен во главната сала.
Инцидентот започнал во лобито на хотелот, каде што осомничениот се судрил со припадници на Тајната служба, додека во салата бил воспоставен дополнителен безбедносен прстен околу Доналд Трамп.
Благодарение на брзата реакција на безбедносните служби, претседателот бил евакуиран за неколку секунди по првите истрели.
Истрагата продолжува, а во фокус ќе бидат можните пропусти во контролата на хотелските гости и безбедносните процедури пред почетокот на настанот.
