Денеска во кругот на Министерството за внатрешни работи беа промовирани 120 нови возила наменети за македонската полиција. На настанот присуствуваа премиерот Христијан Мицкоски, министерот за внатрешни работи Панче Тошковски и директорот на БЈБ Александар Јанев.
Министерството за внатрешни работи набави 120 автомобили „Peugeot 408 Allure 1.6 PureTech 215 KS EAT8“ за речиси 4 милиони евра, односно 239.068.000 денари, со договор склучен на 18.08.2025 година и објавен на веб-страницата за јавни набавки.
Возилата се наменети исклучиво за униформираната полиција и ќе бидат рамномерно распределени низ сите полициски организациски единици во земјата, со посебен фокус на Скопје, како најголем град со најголеми безбедносни потреби.
– „Безбедноста и расчистувањето на криминалот и корупцијата во државата се наш врвен приоритет како Влада, а Министерството за внатрешни работи е нераскинлива алка во тој процес“, истакна премиерот Мицкоски.
Премиерот им честиташе на полициските службеници и најави дека Владата ќе продолжи да поддржува вакви проекти за подобрување на безбедноста во државата.
