Украинскиот претседател Володимир Зеленски изјави дека настаните во Венецуела претставуваат јасен сигнал за начинот на кој Соединетите Американски Држави се подготвени да се справуваат со авторитарни режими.
Коментарите ги даде по апсењето на венецуелскиот претседател Николас Мадуро од страна на американските сили, оценувајќи дека ваквиот потег може да има пошироки глобални импликации. Иако не наведе конкретни имиња, Зеленски индиректно навести дека истиот пристап би можел да се примени и кон други лидери кои, како што рече, владеат со сила и репресија.
„Ако е можно на ваков начин да се справиме со диктатори, тогаш САД добро знаат што е следно“, изјави Зеленски одговарајќи на новинарско прашање, по состанокот на советниците за национална безбедност на европските земји.
Изјавата доаѓа во момент кога американскиот претседател Доналд Трамп потврди дека САД имаат намера привремено да ја преземат улогата во управувањето со Венецуела, сè додека, како што наведе, не се создадат услови за безбедна и уредна транзиција на власта.
Зеленски оцени дека случувањата во Венецуела се преседан кој внимателно ќе се следи на глобално ниво, особено во контекст на односите со други авторитарни режими.
