Експертите сè почесто алармираат дека гел лаковите и UV/LED ламбите за нокти носат поголем ризик отколку што повеќето жени претпоставуваат. Зад совршениот и долготраен маникир може да се кријат алергии, оштетувања на кожата, ослабени нокти и забрзано стареење на рацете.
Иако гел лаковите со години важат за практично и естетско решение, дерматолозите предупредуваат дека нивната честа употреба, особено без паузи и заштита, може да остави последици врз здравјето на кожата и ноктите.
UV и LED ламбите, иако се послаби од солариумите, сепак емитуваат зрачење кое директно ја погодува кожата на рацете. Со тек на време, ваквата изложеност може да предизвика појава на пигментни дамки, забрзано стареење и оштетување на кожните клетки.
Дополнителен проблем се хемикалиите во гел лаковите, кои кај дел од луѓето можат да предизвикаат силни алергиски реакции. Чешање, црвенило, лупење на кожата околу ноктите, па дури и воспаленија и егзема, се сè почести пријавени симптоми.
Ноктите, пак, со текот на времето стануваат потенки и покршливи. Агресивното вадење на гелот, честото стругање и постојаното покривање на ноктната плоча го ослабуваат природниот слој, го забавуваат растот и ја намалуваат цврстината.
Ризик постои и доколку хигиената во салонот не е на високо ниво. Недоволно стерилизираниот прибор и ситните ранички околу ноктите можат да бидат идеална средина за развој на бактерии и габични инфекции, кои често остануваат незабележани во почетната фаза.
Сепак, експертите велат дека не е неопходно целосно да се откажете од гел маникирот, туку да се практикува умереност и правилна нега. Се препорачува правење паузи меѓу маникирите, користење креми со SPF за заштита на рацете, избегнување насилно отстранување на гелот и избор на проверени салони и квалитетни производи.
Убавината не треба да доаѓа на сметка на здравјето. Со правилна грижа, информираност и повремена пауза, можно е да се зачуваат и убави и здрави нокти. Трендовите се менуваат, но здравата кожа и силните нокти остануваат долгорочна вредност.
